Володимир Микита
– Первый лавреат премії имени Ивана Манайла „Pro Arte Ruthenorum”

„Гордый єм, же-м Русин, и страшно люблю свуй народ.

Желаву премії имени Ивана Манайла одкрывати нові имена достойных сынув русинського народа. Най ся премія буде на хосен змуцненя и розвоя русинськуй културы навсе.”

Pro Arte Ruthenorum 2021 - Mikita_Volodimir

Фонд пудпорованя гуманітарного розвоя имени Федора Манайла номіновав на премію члена націоналного союза малярюв Украины, народного художника Украины, академика націоналнуй Академії умілства Украины, сёгоручного юбілара, великаша пудкарпатськуй школы жывописа Володимира Микиту. Світовый Конґрес Русинув и РНС вароша Вац пудтримали сю ініціативу.

Кандідатура Володимира Микиты є єднозначнов. Особость, жывотноє и творчоє кредо у повнуй мірі одповідавуть крітеріям лавреата.

Доимавучыма суть його творчі добыткы. Вун є участником многых малярськых выставок: областных – од 1950. рока, всеукраинськых – од 1957. рока, всесоюзных – од 1961. рока, загатарных – од 1966. рока – Мадярщина, Чехословакія, Румынія, Франція, Італія, Кіпр, Болґарія, Японія, Філіпіны, Нїмеччина, Австрія, Канада. Участник меженародных бєнале: 1963 р. – Гелсінкі (Фінландія), 1974 р. – Кошыцї (Словакія), 1984 р. – Венеція (Італія). 1973, 1974 рокы – Ужгород, Пряшів и Попрад (Словакія). Має веце ги десять персоналных выставок:

1981 – Кієв, Лвов, Ивано-Франковськ, Коломыя, а также Каунас и Шауляй (Литва),

1982 – Ужгород, а также Москва и Звіздяный варошик (Росія),

1991, 1996 – Ужгород, а также Нїредьгаза,

1997 – Требішов, Гуменне, Бардіёв, Меджілабірцї (Словакія),

2001 – Ужгород, Кієв.

2005 – Кієв.

2016 – Ужгород.

2019 – Мукачово, Мукачовськый замок, персонална фурт дївуча выставка.

2021 – Ужгород. Пудкарпатськый художнїй музей.

Його творы суть купленї Міністеріёв културы и умілства Украины, Дірекціёв выставок Націоналного союза художникув Украины, Міністеріёв културы СССР, хранять ся в музеёх Украины, Росії, Литвы, Словакії, Нїмеччины, Мадярщины, державох екс-Юґославії, Венесуелы и пріватных колекціёх многых краин світа.

Досягненя Володимира Микиты высоко оцїненї. Вун є членом Націоналного союза художникув Украины од 1962. рока, Заслуженый художник Украины од 1975. рока, Народный художник Украины од 1991. рока, член-кореспондент Академії умілства Украины од 1997. рока, дїйный член Націоналнуй академії умілства Украины од 2004. рока.

Важным фактом є, же за ініціативов Володимира Микиты 1989-1990 рокох в Ужгородї было заложеной Общество Русинув. Окрем того Володимир Микита участник даскулькох Світовых Конгресув Русинув, котрі проходили у Юґославії, Пряшови, у Празї (де вун дустав премію имени Александра Духновича). Його и доднесь фурт кличуть на вшелиякі културнї подїї, поязанї з пропаґаціёв русинськуй културы.

Сёго рока, позад пандемії, премію Володимиру Микитї передали в Ужгородї 27. авґуста. За дорученём Світового Конгреса Русинув и РНС вароша Вац премію передала голова Фонда помаганя гуманітарного розвоя имени Федора Манайла Вікторія Манайло-Приходько. Премія „Pro Arte Ruthenorum” складає ся з ґравірованого кришталёвого погара з портретом Ивана Манайла, написом „Pro Arte Ruthenorum” и текстом назвы премії: РУСИНСЬКА НАЦІОНАЛНА ПРЕМІЯ ЗА РУСИНСЬКЫЙ КУМШТ ИМЕНИ ИВАНА МАНАЙЛА „PRO ARTE RUTHENORUM”, а также имнём лавреата, діпломы и фінансового пудпорованя творчого дїятельства на суму 200 000 форінтув, у формі сертіфіката на купованя художнїх матеріалув.

Володимир Микита подяковав за высоку награду и зазначив: „Дуже ми приятно за таку высоку оцїнку. Я все ся змагав у своїх творох указати правдивый жывот Русинув, їх світлу душу, псіхолоґію, скромность, миролюбство, богатство їх матеріалного и духовного світа. У сюм я продовжовав традіції Федора Манайла, котрый у свуй час быв моїм наставником, учителём, указав ми, як у творчости треба служыти своюй земли, своїм краянам, видїти великоє у малому, отворяти сутность предметув, быти правдивым” …

… „Дуже приятно, же премія имени Ивана Манайла, сына мого друга и учителя Федора Манайла, радуву ся, же за дорученём Світового Конгреса Русинув и РНС вароша Ваца премію передає Фонд Манайла. З сёв фаміліёв мене капчавуть довгі рокы дружбы и сотрудництва. Про мене тото особа цїнность. Желаву премії имени Ивана Манайла отворяти нові имена достойных сынув русинського народа. Най ся премія помагать змуцнёваню и розвою русинськуй културы на вшыткі будучі рокы.”

 

из статї Вікторії Манайло-Приходько

Офіціална вэб-сторонка художника:

 http://mykyta.com.ua/